42 urteko behargin batek bizia galdu zuen atzo, nekazal ustiategi batean lanean ari zela, orein batek harrapatu eta gero. Muniaingo (Nafarroa) etxalde batean izan zen lan-istripua, 11:30ak aldera; langilea oreinei janaria ematera sartu zen itxitura batera, eta oldartu egin zitzaion animalietako bat.
Zauri larriak egin zizkion bularrean beharginari, eta ondorioz, odol asko galdu zuen. Hortaz, larrialdi-zerbitzuetako langileak ustiategira bertaratu arren, ez zuten lortu behargina suspertzea.
Iturri sindikalen arabera, urtea hasi zenetik 57 lan-heriotza izan dira Euskal Herrian, lanpostuetan bertan, lanera bidean edota lanetik bueltan.
