Azaroaren amaieran deitu zuten grebara Haurreskolak partzuergoan: hain zuzen, abenduaren 10erako eta 16rako egin zituzten deialdiak, urrian hasitako mobilizazioei jarraipena emateko asmoz.
Beharginei inposatu dizkieten gutxieneko zerbitzuak "gehiegizkoak" izanda ere, %73k egin dute greba gaurkoan. 278 langileri oztopatu diete greba eskubidea, eta sindikatuek salatu dutenez, gutxieneko zerbitzuen interpretazioan harago joan da partzuergoko kudeatzailea.
Beharginen lan-baldintzei dagokienez, lan-hitzarmena konplitzea edota ordezkapenak betetzea dira, besteak beste, langileen eskakizunak, eta oro har, lan-baldintzek okerrera egin dutela salatu dute. Bestalde, baina, partzuergoa Hezkuntza Sailean integratzea, aurrekontua handitzea edota 0-3 urte arteko haurren hezkuntzaren doakotasuna aldarrikatzen dituzte.
