Atzo, hilak 24, Nafarroako garbiketako emakume langileek salatu zuten sektore bereko gizonezkoek baino diru gutxiago kobratzen dutela. Garbiketa sektorean aritzen diren beharginak, nagusiki, bi eremutan bereizten dira: alde batetik, bideko garbiketetan jarduten dutenak, eta bestetik, eraikinak eta bulegoak garbitzen dituztenak. Lehenengoan gizonezkoak dira gehiengoa; bigarrengoan, aldiz, emakumezkoak.

Nahiz eta sektore berean soldatapean jardun, gizonezkoen eta emakumezkoen arteko soldata arrakala mahaira atera dute Nafarroan. ELA sindikatuaren arabera, orohar, emakume langileek %13-20% gutxiago kobratzen dute egun. Horretaz gain, "lanaldi errealari erreparatuko bagenio, batzuen eta besteen arteko aldea handituko litzateke, %18-%25era arte". Emakume langile gehienak, gainera, lanaldi partzialetan aritzen dira.

Horren guztiaren aurrean, eta soldata berdintasunaren alde, mobilizazioak iragarri dituzte Nafarroako garbiketa sektoreko emakume beharginek.