Laster saiatuko dira Zestoako (Gipuzkoa) Gaztetxea husten. Gazte Asanbladak berriki jakinarazi duenez, desalojoaren eguna zehaztu dute jada epaitegiek: datorren uztailaren 19an izango da, ostiralez. Gaztetxea defendatzera deitu dute Gazte Asanbladako kideek, eta hainbat ekimen antolatu dituzte datozen asteetarako.

Uztailaren 8tik 15era bitartean, propaganda-lanak egingo dituzte arratsaldez, 17:00etatik aurrera. Uztailaren 11n zumba saio bat eta txokolate jana izango dira, eta umeentzako jolasak ere prestatu dituzte, 17:30erako. Lajayan jarri dute arratsalde horretarako hitzordua.

Uztailaren 15etik 17ra bitartean, Gaztetxearen aldeko kale-bueltak egingo dituzte egunero. 20:00etan hasiko dira, herriko plaza nagusitik. Uztailaren 17an, berriz, Gaztetxearekin elkartasunez antolatutako futbito txapelketako finala izango da, 19:00etan kiroldegian.

Desalojoaren bezperari begira, arratsalderako egin dute deialdi bat. Uztailaren 18an, hain zuzen ere, bere azken antzezlana eskainiko du Ekida Arte Ekimen Sozialistak: Plaza hau gurea da. 18:30ean izango da emanaldia. Horren ondoren Rodeo eta Ezpalak taldeak arituko dira akustikoan, eta gauean afaltzeko aukera egongo dela azaldu dute Zestoako Gazte Asanbladako kideek.