Gutxienez bost eraso matxistaren berri eman zuten Gasteizen (Araba) aurreko asteburuan. Lau emakumeri, hain zuzen ere, euren bikotekideek edo bikotekide ohiek egin zizkieten eraso fisikoak; eta bosgarren bati taberna batean egin zioten sexu-erasoa.

Larunbat goizaldean, 02:30ak aldera, Armentiako etxebizitza batean eraso zion emakume bati bere bikotekideak; 37 urte ditu. Biktimak eman zuen abisua. Larunbat eguerdian, 13:00ak aldera, adin bereko beste gizon bat atxilotu zuten Salburuan, bere neska-laguna jotzeagatik. Emakumea ere atxilotu zuten, bikoteak "elkarri eraso" ziolakoan. Egun berean, 18:00ak aldera, 24 urteko gizonezko batek eraso zion bere bikotekideari, Errotako lokal batean. Bere seme-alabekin topatu zuten biktima. Handik hainbat ordura, igande goizaldeko 01:30ean, kalean eraso zion neska-lagunari 35 urteko gizon batek, Vicente Goikoetxea kalean. Ihes egiten saiatu zen erasotzailea.

Horretaz gain, Gasteizko taberna batean jasan zuen sexu-erasoa beste emakume batek. Larunbat goizean izan zen, 09:00ak baino lehen: 30 urteko gizonezko batek ukituak egin zizkion neskari.