Ikasle Abertzaleakek martxoaren amaieran salatu zuen Gasteizko (Araba) musika kontserbatorioko ikasle baten egoera. Martxoaren 30eko ikasle grebari lotutako propaganda politikoa egiteagatik, eskolan zigortu egin nahi zutela azaldu zuen IAk: umiliazio publikora makurtu nahi zuten, kontserbatoriotik kanporatzearekin mehatxatu zuten eta bere militantzia politikoari uko egin ziezaiola eskatu zioten.

Hori zela-eta, eta askatasun politikoen defentsan, protestara deitu zuten IAko kideek: elkarretaratze bat egin zuten kontserbatorio aurrean, Kanporaketa-mehatxua gelditu. Askatasun politikoak defendatu lelopean.

Gasteizko IAk atzo jakinarazi zuen musika kontserbatorioari egindako exijentziak betearaztea lortu duela. Zehazki, propaganda politikoa egiteagatik jazarritako ikaslearen kontrako kanporatze-mehatxua bertan behera geratzea lortu dute IAko kideek, bai eta bere "umiliazio publikoa helburu zuten zigorrak" atzera botatzea ere.

Horretaz gain, eskolan lan politikoa egiteko baldintzak hobetu dituzte: egindako borrokari esker, "jardun politikorako eta biltzeko baldintzak" ere eskuratu dituela azaldu du IAk. "Askatasun politikoen urraketaren aurrean", antolatzera dei egin diete berriz ikasleei.