EAEko osasungintza publikoko langileek greba egingo dute urriaren 29an, azaroaren 5ean eta 12an. "Eusko Jaurlaritzak mobilizazioaren bidea baino ez digu utzi", kexu dira. Grebaldiak hiru herrialdetan gauzatuko dira; Araban lehena, Gipuzkoan bigarrena eta Bizkaian hirugarrena.

Besteak beste, "giza baliabideen eta baliabide materialen eskasia, lan gainkarga sistematikoa, behin-behinekotasun tasa altuak, akidura fisiko eta emozionala, lan eskubideen murrizketak, zerbitzuen pribatizazioa, babesgabetasuna eta lan osasunaren utzikeria", salatu dituzte beharginek.

COVID-19aren osasun larrialdiak gabezia horiek azaleratu dituen arren, "urrunetik" datozela azaldu dute: "Ez dira desagertuko egiturazko eta sakoneko konponbideak martxan jartzen ez badira".