Beste eraso faxista baten berri eman dute Euskal Herrian, oraingoan, Bilbon (Bizkaia). Eraso egin diete Ikasle Abertzaleak antolakundeak Begoñazpi Ikastolatik hurbil jarritako hainbat karteli, gainetik sinbolo eta mezu faxista batzuk margotuta: "Putos rojos", "División Bilbao", "Falange Bilbao", eta abar.
IAk pintaketak ezabatu ditu jadanik, eta jakinarazpen argi bat egin du gertatutakoari lotuta: "Ikasle langileok ez diogu biderik utziko faxismoari". Faxismoa borrokatzera deitu du ikasle-antolakundeak, eta, borroka horretan, ikasle langileak lehen lerroan egongo direla dio. Bestalde, urtarrilaren 25erako Gazte Koordinadora Sozialistak (GKS) antolatu dituen mobilizazioetara batzeko deia egin du, faxismoaren eta gerraren kontra.