Europako Giza Eskubideen Auzitegiak ez du tramitera onartu Altsasuko gazteen eskaria. Altsasuko auzian izandako irregulartasunak salatu zituzten gazteek duela urtebete, Estrasburgoko auzitegian, baina ez dute eskaria aztertzerik onartu. Besteak beste, gazteek salatu zuten Espainiako Auzitegi Nazionalean ez zutela "epaile inpartzial bat" edukitzeko aukerarik izan, eta aurkeztutako frogak ez zizkietela onartu.
Gaur, Iñaki Abad auzipetuak jakinarazi du Estrasburgoko auzitegiak uko egin diola irregulartasun horiek aztertzeari, eta beraz, kasuaren ibilbide judiziala amaitu dutela.
79 urteko espetxe zigorra
2018ko ekainean 79 urteko espetxe zigorra ezarri zieten zortzi auzipetuei, bi urte lehenago "kalez jantzitako bi guardia zibil eta haien bikotekideak jotzea" leporatuta. Auzitegi Nazionaleko epaimahaiak errefusatu egin zituen indar errepresiboetako kideen testigantzak gezurtatzen zituzten frogak eta gazteen kontaketa indartzen zuten gainontzeko ebidentziak.
Gaur egun, espetxean bete beharreko denbora kunplitu dute dagoeneko auzipetu guztiek. Kartzelatik dira auzipetu guztiak, baina zigorrak betetzen ari dira oraindik haietako batzuk, hirugarren graduan.