Goierriko Kontseilu Sozialistak euskarari buruzko jardunaldi bat antolatu du eskualdean aurrenekoz. Pasa den asteburuan, hala, bi egunez izan dira txapela horren azpian jarritako hitzorduak, Arriaranen (Beasain, Gipuzkoa) eta Urretxu-Zumarragan (Gipuzkoa).
Ostiralean eman zioten hasiera jardunaldiari, solasaldi batekin: euskarari eta, besteak beste, hizkuntza politikei buruz aritu ziren Kike Amonarriz eta Paul Beitia. Arriarango elkartean egin zuten saioa, arratsaldez, eta jende ugari bertaratu zen. Horren ostean, bertso-afari bat izan zen toki berdinean. Maider Arregi, Aitor Bizkarra eta Eneko Araiztegi aritu ziren kantuan.
Hurrengo egunean, larunbatean, Urretxu-Zumarragan elkartu ziren euskarari buruzko jardunaldiaren harira. Lehenik eta behin, Miseriaren adarrak bertso-ikuskizuna izan zen Labeaga aretoan, Ekida Arte Ekimen Sozialistaren eskutik. Gauean, berriz, musika emanaldiak izan ziren Urretxu-Zumarragako Gaztetxean; Ktarsia eta Hiri Galduak taldeak aritu ziren oholtzaren gainean.