Euskal Herriko Laborarien Batasuna (ELB) sindikatuko kide bat epaituko dute bihar, azaroaren 12an, Paueko (Akitania) Zigor Auzitegian. Epaiketa salatzeko, elkarretaratze batera deitu dute ELBk eta LABek: goizeko 11:30ean egingo dute protesta auzitegi aurrean. Paueko DDPP64 Herritarren Babesaren Departamentuko Zuzendaritza okupatzea leporatzen diote auzipetuari.
Hegazti gripearen krisiaren harira okupatu zuten aipatutako egoitza, 2023ko ekainaren 8an. Laborariek azaldu dutenez, 2015az geroztik, hegazti-hazleak "infernu bat" bizitzen ari dira, eta agintaritzek ez dute osasun-politika "eraginkorrik" ezartzen gripearen krisiari aurre egiteko.
Hori ez ezik, gripe hori zela-eta 2017an adostutako ituna ez da betetzen ari, langileek azpimarratu dutenez: ez dira hitzartutako neurriak betetzen. "Kanpoko hazkuntza desagerrarazten tematzen dira, nekazaritza-industriako interesak defendatzen dituzten interprofezioen kolaborazioarekin", seinalatu dute.
Egoerak, gainera, okerrera egin du 2021etik aurrera. Laborarien esanetan, ez dituzte "bakean" utzi azken urteetan, eta "hazleek hiltze prebentiboak, klaustrazioak eta etengabeko presioa jasaten dituzte, Herritarren Babesaren Departamenduko Zuzendaritzarengandik". Arrazoi horiengatik guztiengatik egin zuten protesta iaz, eta Pauko DDPPa okupatu zuten, Modefekin eta Laborarien Konfederazioarekin batera.