Istiluak izan ziren Sopelan (Bizkaia) larunbat gauean. Herriko jaiak izan ohi dira data horietan, eta udaletxe inguruan (Loroño kalean, zehazki) zenbait pertsona bilduta zeudela, haien aurka jo zuen Ertzaintzak; foam jaurtigailuak erabili zituzten poliziek. Antza, ertzainei aurre egin zieten han zeuden hainbat pertsonak, besteak beste, zenbait objektu botata.
Istiluen harira, lagun bat atxilotu zuten ertzainek, modu bortitzean; saihets bat apurtu zioten atxiloketaren unean. Polizia-etxean igaro behar izan zuen gaua atxilotuak, eta igandean 14:00ak aldera utzi zuten aske.
Igande arratsaldean, 19:00etan, elkarretaratzea izan zen Sopelako txosnagunean; Errepresiorik ez lelopean, larunbat gauean gertatukoa salatu zuten bertaratutakoek. "Agintari politikoek gazteria kriminalizatzeko erakusten duten borondatea" salatu zuten, "atxilotuaren berehalako kargurik gabeko askatasuna" exijitzearekin batera. Dirudienez, "desordena publikoak" eta "agintaritza-agenteen aurkako atentatua" egozten dizkiote.