Hego Euskal Herrian gora egiten jarraitzen du langabeziak, Espainiako Estatuko Lan Ministerioak argitaratutako datuen arabera. Martxoan, guztira, 494 langabetu gehiago zenbatu dituzte enplegu-zerbitzu publikoetan, eta beraz, dagoeneko 172.508 lagun dira langabetu gisa erregistratuta daudenak.

Otsaileko datuekin alderatuta, langabetuen kopurua hazi egin da Araban, Bizkaian eta Gipuzkoan: Bizkaian 785 pertsona gehiagok eman dute izena enplegu-zerbitzuetan, Gipuzkoan 165 gehiagok, eta Araban 43 gehiagok. Hortaz, une honetan 73.559 langabetu daude erregistratuta Bizkaian, 34.564 Gipuzkoan eta 21.898 Araban.

Nafarroan, aldiz, otsailean baino 499 pertsona gutxiagok jo dute enplegu-zerbitzuetara martxoan. Orotara, gaur egun 42.487 dira langabetu modura izena emanda daudenak. Dena den, azken hamabi hilabeteetako datuei erreparatuz gero, Nafarroan izan da langabeziaren gorakadarik nabarmenena: %13,71 igo da kopurua, beraz, 5.122 langabetu gehiago hauteman dituzte.

Araban %2,1ekoa (+450 langabetu) izan da gorakada azkeneko hamabi hilabeteetan, %1,37koa (+467 langabetu) Gipuzkoan, eta %1,23koa (+891 langabetu) Bizkaian.